آه يا صندوق المحادثات(قصة حقيقية)

السلام عليكم ورحمة الله و بركااته

كيفكووم بنااات اولااد ؟؟!!



الحب ذل الوصل عار لا صار تاليها هوان اليكم قصتي


كنت اتدرب على السباحة في نادي ابوظبي للسيدات وانصبت اصابة في ظهري اثناء
تمارين الرقص تحت الماي وقعدت بعدها بالبيت بلا حركة والام فظيعة في كامل
الظهر واعلى الفخذ والاكتاف واستمريت على هالحال 3 شهور بسبب عنادي في
العلاج وفي ليلة من الليالي كنت قاعدة بروحي وجدامي طاولة الكمبيوتر وما
كانت عندي اهتمامات من قبل في الكمبيوتر او الانترنت بس من المرض والملل
دشيت النت وليتني ما دشيته

سجلت في عدة منتديات ومن ضمنها منتدى محلي لفت نظري فيه صندوق
المحادثات الموجود في اعلى صفحة المنتدى لاحظت ان الاعضاء يسولفون مع بعض
سوالف ومزح شباب وبنات ورغم ان تسجيلي فيه كان لمجرد التصفح الا ان بعض
السوالف والضحك رسمت البسمة على وجهي ولاني انسانة جدية ومعروف عني اني
مااحب السوالف والمصخرة الا ان هالسوالف خففت عني الكثير من الوحدة والملل
والمرض وبصراحة كنت متضايجة من سالفة انهم اغلبهم اهل ومعارف واصدقاء وكنت
انا الغريبة فيهم وفي بعض الاحيان ما اعرف افتح معاهم مواضيع واسلوبي جديد
عليهم ومتخوفة من ردود افعالهم او انهم ما يتقبلوني

بس اللي صار العكس تماما وشاركت وتفاعلت معاهم وتعلقت فيهم لدرجة ما
تتخيلونها طبعا اهلي كان لهم رد فعل مختلف لانهم موب مقتنعين ان بنتهم تشغل
وقتها بشي تافه اسمه منتدى ومع ناس غير معروفين خاصة ان للعايلة منتدى
معروف على المستوى الخليجي والعربي ولكن اندماجي كان اسرع في منتدى الناس
الغرب

صار هالمنتدى بالنسبة لي شي اساسي ما استغني عنه عادي اجوع وعادي اعطش
وعادي احرم نفسي من النوم بس ما احرم نفسي من الدخول لهذا المنتدى شي جديد
ما قط جربته بحياتي

ان هالناس رسموا البسمة على وجهي رغم ان المنتدى السابق ما كنت مهتمة فيه
كثير وتعاملي مع الاعضاء تعامل رسمي وشديد وغالبا ما كانوا يطفروني الاعضاء
بتعليقاتهم القوية اللي ما استسيغها ابدا وبحجة انها مجرد سوالف وما تزعل
حد الا هالمنتدى المحلي كان فيه سوالف ومزح بس بحدود واذا زعلت يحسون فيني
ويراعون مشاعري

ومرة اثناء مشاركاتي كنت الوحيدة القاعدة اشارك مع ان فيه اعضاء متواجدين بس مو قاعدين يشاركون وحصلتهم قاعدين يسولفون في صندوق المحادثات ولما خلصت من كتابة مواضيعي ومشاركاتي قعدت اتابع سوالفهم وعجبني اسلوب واحد من الاعضاء

اول شي لفتني فيه اسمه لانه يشجع نادي انا احبه لفت انتباهي باسمه وبعدها
بسوالفه ولاحظت عليه شيء من التدين وجربت ادخل الصندوق وطبعا ما سلمت من
التعليقات والمزح واستلمني هالعضو

بالبداية كان متحفظ معايه وبعدها تناقشنا في امور كثيرة اذجر منها البلدان
اللي سافرنا لها والاماكن وغيرها من الامور وبعدها زال التحفظ وصرنا نسولف
لدرجة كبيرة لدرجة انه يطلب مني اشوف نفس القناة اللي يشوفها ونقعد نعلق
عالبرامج اللي نتابعها وجميع الاعضاء يدخلون وكل حد يسال شو السالفة؟ واحنا
نضحك ونكمل حديثنا

احلى الاشياء انه ربط بيني وبين مستر بين الكوميدي وتعلق فيني وتعلقت فيه
صرت اذا ما اشوفه في المتواجدين على المنتدى اتضايج وانتظر دخوله بفارغ
الصبر والظاهر ان الاحساس كان متبادل من الطرفين صار المنتدى بالنسبة لي هو
فلان واذا فلان موب فيه يجيني اكتئاب والدمعة على طرف عيني واذا مرت ايام
وما دخل اقعد اصيح وهو موب حاس ولا يدري..

شلون قدر هالانسان يسرقني من كل اللي حواليني ويخطفني من اهلي وزوجي وصديقاتي واخواني انا بروحي ما اعرف السبب ..

تبادلنا الآراء والافكار وفي محادثاتنا واللي تعتبر مثل الغرف المغلقة
صارحني بهمومه وصارحته بهمومي خبرني اسراره وخبرته اسراري ومعاه عالم ثاني
عشت..

بالنسبة له أنا موب اول وحدة عنده عالمسنجر بس بالنسبة لي هو اول شاب عندي
عالمسن لهالسبب تعلقت في فلان وايد لدرجة ما تتخيلونها..حبيت ه حب برئ طاهر
ونزيه عن ملذات الدنيا وهو قد ما يقدر يحاول يتفرغ لي شفنا صور بعض وكل
واحد مننا يقول الزين عندي ولله الحمد

وفي يوم من الايام قاللي فلان: انتي ليش تعامليني بجفاء ليش قاسية عليه ؟
خاطري تفهميني قلت له: ليش احنا موب متفاهمين؟ انا ما افهمك؟ وما اذجر اني
عاملتك بقسوة او جفاء مثل ما تقول..قال :عطيني قلبج.. قلت له: اخاف اندم..
قال: عطيني اياه وما بتندمين ,,قلت له: انا لما احب احب من قلبي واللي احبه
يكون بالنسبة لي كل شي بحياتي وموب مستعدة اغامر.. لانك اذا تخليت عني
بالاخير بتعب وبمرض وايد وما اتحمل الفراق..قال: عطيني قلبج وصدقيني ما
بتندمين خاطري اعرفج من قرب اشاركج حياتج واذوق حبج,,,

الى هنا انتهت قصة الحب الطاهر وابتدت مرحلة حب غريب وانتهى بغرابة,,,,,,,,,


وبصراحة هو كان حبوب ولطيف لاخر درجة معايه ويراعي مشاعري بشكل ما يتخيل

مرت الايام والشهور شهور طويلة على معرفتنا بس بالمسنجر والمنتدى الى ان
صار بيوم وقررنا نعرف بعض عن طريق التلفون لان ما صرنا نطيق البعاد وصار
المحظور



بالبداية ما كنت واثقة منه فكلمته عدة مكالمات من اماكن مختلفة لحد ما اطمانيت له
وكلمته من جوالي لكن مع بعض الحذر لأن ولا مرة حادثته من رقم مسجل باسمي أو
اسم عائلتي واقسى شي بالحب هذا انه حب كبير انا وياه فينا رومانسية بشكل
مو طبيعي واذا هو حصل له شي احلم فيه وياما حلمت اني قاعدة معاه ونسولف
ونبتسم ومرتاحين وهو يحلم اننا نتمشى على البحر وماسكين ايادي بعض

يعني اللي يسمع علومنا بيتخبل بيقول هذيلا مجانين موب ناس طبيعيين والشي
الحلو اللي شدني له انه يتجنب يجرحني واذا سواها يتعب ويلوم نفسه وايد
ويعتذر مني

ترابطنا قوي لدرجة اننا مهما قررنا نترك بعض نبعد يوم يومين بالكثير 3 ايام وبعدها نرجع مرة ثانية لبعض اقوى من قبل

وكانت هناك محاولات جادة من اهليه عشان اتركه وانتبه لحياتي وزوجي وبيتي بس
ما قدرت لما اقعد مع نفسي ابكي لاني قاعدة اعصي ربي واخون زوجي لكن اصحى
ثاني يوم وارجع لسحر الحب اللي ما اقدر اقاومه

في بعض الاحيان كنت احس انه يتسلى بي موب جاد في حبه لي من عدم اهتمامه ومن
قلة سؤاله واحيانا كنت احس العكس يعني يمكن حبني بس موب ذاج الحب اللي
يسمونه حب مجرد اعجاب وتعلق بي

بس كنت اجامل نفسي واكمل معاه لانه ملا عليه حياتي بديته على نفسي واهلي
وكل شي يخصني وتفرغت له هو وبس حتى صديقاتي قاطعتهم بسبب انشغالي معاه اذا
مو بالمكالمة بالمسجات وما تمر ليلة بدون ما اسمع صوته واذا هو قاعد بمكان
وما يقدر يكلمني لابد يرسل صورته من المكان اللي هو فيه والا ما برتاح ولا
بيغمض لي جفن

وبعد ما كملنا11 شهر من معرفتنا ببعض تغير الحب فجأة وصار يبتعد بشكل موب
طبيعي وما يسال وهالشي صدمني كثير منه حاولت اعرف منه سبب ابتعاده بس ما
قدرت وهو اعذاره انه مشغول او مع ربعه حسيت انه مل مني واجهته فقال حرام
عليج انا امل منج لا تقولين هالكلام مرة ثانية وما ابي اسمعه منج

ومرت فترة طويلة اسبوع واسبوعين والوضع ما تغير بالعكس صار اسوأ, ماصرنا
نتكلم مثل قبل ولو قدرت اكلمه يكون مستعجل او وراه مشوار او يبي ينام
اومشغول مع اهله رجعت اساله قال بصراحة انا احس اني متعبنج وايد بشكل موب
طبيعي ويايه يعني مسبب لج عذاب وارهاق ودايما مشغولة فيني قلت له خلاص تقدر
تتجنب عذابي بانك اتطمني عليك اول باول وجي انا ما بحاتيك وما بتعذب قال
انا ابي نخفف من تعلقنا هذا هالشي فوق حده!! وصدمني مرة ثانية من وين جته
هاالافكار الغريبة؟ والله تعبني معاه!!

وطبعا كملت سنة من تسجيلي بالمنتدى تاريخ تسجيلي فيه 1-7-** وقبل ما اكمل
سنة في المنتدى طلبت من مدير المنتدى اللي هو يصير حق الحب- بس طبعا ما كان
يعرف اللي بيني وبين حبي- انه يعطيني صلاحيات الادارة لاني قادرة على
ادارة المنتدى اثناء تغيب المدير وبنفس اليوم عطاني اياها وصرت ادارية
بمنتدى الحب وهله وهالشي طبعا فرحه حيل مع انه ما كان له دور لا من قريب
ولا من بعيد في ترقيتي وبتاريخ 1-7-** دشيت المنتدى بوظيفتي اليديدة
والشاهد الله اني بذلت قصارى جهدي في تطوير المنتدى وترقيته ودعوة الاعضاء
وبعد ما كان ما يدخلونه الا واحد او اثنين صاروا يدخلونه فوق 13 عضو وهالشي
انجاز بحد ذاته بالنسبة لي خلال شهر واحد قدرت اغير اشياء كثيرة واهم
انجاز عندي اني صرت قريبة من الاعضاء ومحبوبة منهم وكانت اخت الحب معاي
عالمسن وتصمم احيانا اني اخبرها بعض التفاصيل اللي تصير بالمنتدى والمشاكل
اللي فيه وانا بحسن نية كنت اخبرها الا ان حصل شي غير مجرى الاحداث

مشرف متميز عندنا ظل يتابعني وجمع عني معلومات كثيرة وفي يوم صارت مشكلة
بالمنتدى واشتكى لي وقال انه يبي يكون بالرقابة العامة عشان يرضى ويقعد
معانا والا بيرحل,, ولانه متميز ما حبيت اخسره وعينته على طول مراقب عام
ولانه ما يعرف شي بلوحة التحكم ضفته عندي عالمسن وعلمته لكنه كان غريب
الاطوار يسال وايد بالامور الخاصة عني وواجهني بالاشياء اللي يعرفها عني
وانا استغربت من وين عرف؟؟ واوهمني انه يحبني ومتعلق فيني وبصراحة ما اعرف
هالشي صدق والا جذب

صديته كثير بس بالاخير تعلقت فيه لانه لامس الجرح الا وهو جرحي من حبي
وشكيت له من تصرفات حبيب الروح معايه وانا لمن خبرته ما قلت له انه فلان
اللي بالمنتدى ولكنه عرف هالشي وادركه من خلال تحرياته عني خصوصا ان الحب
ما عاد يهتم فيني ولا يسال وتمر ايام من دونه فزعلت منه وقررت اني اتركه
رغم ان بداخلي نااار من سبب فراقه وكنت احول حزني وغضبي احولها لطاقة من
اجل اسعاد الاعضاء وتطوير المنتدى واحاول قد ما اقدر كلما ذجرته افتح اللاب
توب واشغل عمري بالمنتدى وسوالف الاعضاء

وفي يوم من الايام حصل خلاف قوي بيني وبين هالمشرف بسبب علاقاته الغير
واضحة مع بنات المنتدى وتصرفاته الغريبة وغير شكاوي بعض الاعضاء والعضوات
منه فنزلته من الرقابة العامة وقرر ينتقم مني وسوا مشاكل لا حصر لها في
المنتدى يعني خربه عالاخر وطفر الاعضاء منه ودمر كل اللي بنيته وتعبت فيه
فسويت له حظر للابد

ورغم ذلك ما استسلم ودخل باسم واحد من المشرفين اللي يصير ربيعه ودخل قسم
اداري ومن المعروف ان الاقسام الادارية ما يدخلها الا الادارة والمشرفين
وقام وكتب كل الاشياء اللي ذكرتها له عن حبيب القلب وزاد عليها ملح وبهارات
وكانت الشعرة اللي قصمت ظهر البعير..

وطبعا انا كنت بعيدة عن كل هالامور ونايمة في بيتنا الى ان وصلني مسج من
اللي كان حبي ويطلب مني اتصل به فاتصلت فيه حتى قبل ما اقوم من السرير
وبمجرد ما سمعت صوته حسيت ان في شي موب طبيعي صاير له سالته وش صاير قال
دشي المنتدى وشوفي قلت له ما اقدر اللاب توب موب عندي قال حاولي وادخلي
ولما اصريت اعرف منه تفاجات بصراخه وعصبيته وعنفني وايد وخبرني بكل الي صار
طبعا انا انصدمت وما رديت ولا بحرف واحد وطلب مني ادخل المنتدى وارد له
كرامته

ودشيت المنتدى ودافعت عنه مثل ما طلب وطلبت منهم ما يدخلونه في السالفة
وانه ماله دخل وحذرت المشرف من عذاب الله عشان اللي سواه فيني وكتبت
انسحابي من ادارة المنتدى ورحيلي للابد منه

خاصة ان صحتي كانت متردية جدا وقررت اهتم بنفسي ولكن من كان حبي ماراح من
بالي قعدت احاول اصلح معاه الامور واطلب منه السماح والتصالح بس ما قدرت

وحسيت انه بيحاول يرد كرامته على حساب سمعتي فقررت استفزه بالمسجات لحد ما
فهمت من ردوده انه فعلا ما ستر عليه وباع اللي بيننا وكان يخبر عن مسجاتي
اللي ارسلها له واتصالاتي اللي يطنشها ..وعرفت ان الحب الكبير كان مجرد
تسلية!

نعم تسلية !! للأسف..هالحقيقة اللي حاول يفهمني اياها كل من شاف حبي له
اهتمامي فيه وكنت اطنش كل النصايح والتوجيهات بس لجل ما افترق عنه

عشقته بجنون حب هبال موب حب ناس عاقلين وهو ادرك هالشي بس بدل ما يحنن قلبه زاده غرور بنفسه

الكثير من اللي يعرفون اللي بيننا لاحظوا تعبي ونزول الهيموجلوبين في دمي
ونومي المتواصل ونقصان وزني ونصحوني وقالوا لي لو هو صدق شاريج كان اقل شي
يسويه انه يكلمج ويعاتبج ويحاول يفهم الموضوع منج ويحاول يفهم منج ليش صار
هالتصرف منج موب انه يزعل ويروح كانه يدور سبب للفراق!

وحاولت احط نفسي في مكانه وفعلا لو ان هالشي صار لي منه صح بزعل بقوة لكن
موب لدرجة الفراق خاصة مثل ما قلت حبنا موب شي بسيط وانا ضحيت عشانه اكثر
من تضحياته هو عشاني بس ليته قدر هالتضحيات للاسف!!

واول كلمة سمعتها من انسانة دوم كانت تعاتبني وتقول ترا حبيب القلب ما يحبج
وهو يتسلى بج وما كنت اصدقها ابد وبعد ما انتهى كل شي كلمتني وقالت: وينه
فلان؟- وانا سكت لحظة موب مستوعبة الصدمة - رجعت تسال وينه فلان الحين؟
تخلى عنج بالاخير؟؟..وطبع ا انا سكت وما نطقت بحرف وغمضت عيوني قهر وحسيت
قلبي يعتصر كان معاها حق بكل اللي قالته لي..

ولما دخلت المسنجر حصلت كلمات المواساة والعتب في نفس الوقت من كل اللي نصحوني اني اتركه وكرسوا وقتهم لي عشان اتخلى عن هالحب الضايع

عتب لاني تاخرت كثير لحد ما فهمت الواقع ومواساه في وفاة من كان حبي من قلبي

تسامحت من الجميع وخصوصا ان رمضان شهر الخير وقررت بالاخير اني اتسامح من
المشرف الشرير وارسلت له ايميل وشكرته فيه بدون ذكر سبب الشكر وطبعا سبب
شكري له معروف لانه بالفضيحة اللي سواها لي ولمن كان حبي خصوصا - خلاني
اكتشف نوعية ومعادن الناس وخاصة الانسان اللي حبيته وحبني وطلع حبه لعبة
كبيرة.

ورغم اللي صار كله كنت أحمل نفسي الذنب فوق طاقتي أولا لأني حبيت انسان كل هدفه انه يستغلني عشان يشغل حاجاته النفسية والعاطفية

وثانيا لأني تحت الضغط النفسي اللي حطني فيه من كان حبي شكيت لانسان أشك انه ينتمي لعالم البشر

وثالثا لاني ما كنت استمع لنصايح كل من يحب لي الخير ويطلبون مني الابتعاد عن طريق الحب المزروع بالشوك

والغريبة ان القصة بدأت تاخذ منحى آخر..تفاجأت لما دخلت المسنجر بعد فترة انقطاع ان معظم من وضعوا لي بلوك رجعوا رفعوه عني؟!!

ورغم ذلك انا رفضت ارفع البلوك عنهم..ما عدا مدير المنتدى ومن كان حبي ما
حطيت لهم بلوك وحاول من كان حبي يسلم ويسأل اول ما دخلت فرديت السلام لكني
رفضت احادثه وفهمته اني تركت هالطريج للأبد وما أبي أرجع له مرة ثانية..

كات صدمة لي انه سلم بصراحة تضايجت لأنه طلب مني أنساه وأمحيه من حياتي
وصدني بقوة وغلط علي وأهانني كثير وكل شي الا الاهانة ما تحملتها ولهالسبب
أول ما تراجع عن كلامه و حادثني حسيت أنه يناقض نفسه وصديته

هو الخسران..هالجمل ة اللي أسمعها من كل من عرف أو سمع حكايتي كاملة قد
يكون للبعض وجهة نظر مختلفة لأنني أخطات لما كشفت سري لانسان وفضحني ولكن
انا بشر وخطاي لا يستحق اللي صار معاي

حصل اللي حصل والضربة اللي ماتذبحني تقويني ..ما عادت حياتي كالسابق

نظرتي للحياة تغيرت تماما صرت أكره شي اسمه الحب

وعلى الرغم من تسامحي الا ان تناول سمعتي بالسوء خلاني أصير انسانة ثانية
كلما يطرأعلى بالي ان فلان تلاعب بمشاعري باسم الحب وفلان استغل مصارحتي له
وفلان اللي عديته اخ قذفني بالسوء وفلان تعاون معهم ضدي

احيانا أرغب بالانتقام بشدة واحيانا استغفر رب العالمين وأقول لنفسي لو قادتني قدرتي على ظلم الناس أتذكر قدرة الله علي

ولكن قلبي محترق..بداخلي نار شعالة..قررت أدمر المنتدى.. وأدمر ايميلات جميع من تعاون ضدي

واحيانا أرجع وأقول لأ..اصبري شوي ان الله مع الصابرين..واذا تدمير منتدى وتخريب ايميلات راح

يجرحهم فاكيد عقاب الله سبحانه وتعالى أشد وأقوى

من وين بتتوفق في حياتها البنت اللي حسبتها صديقة وفرطت بأسراري وشوهت
سمعتي وتكلمت عني بالسوء..هل نست هالبنت ان كل قصة حب لابد فيها من طرفين؟
أنا واخوها.؟وهل ظنت ان اخوها انسان مثالي عمره ما تناولني بالسوء أو اذاني
بشي؟

من وين بيتوفق الشاب اللي دبر المكيدة هو وربعه؟

ومن وين بيتوفق اللي لجأت له عشان يحميني من هالفاسدين وبدل ما يحميني سلمني لهم بكل طيب خاطر

ومن وين بيتوفق الشخص اللي فتني في الدنيا وعرفني على الحب وملذاته وبعدني عن الدين وغدربي بالأخير

لجأت لله سبحانه وتعالى ليرفع الظلم اللي حل بي ويسامحني على ما فرطت في نفسي

وسوف انتظر عدالة السماء فهي بلا شك أقوى واشد ولابد اأنهم سيذكرونني يوما حين تتحقق العدالة الالهية


فاتمنى من البنات انهن يحذرن من حب المنتديات ترا صدقوني مثل ما انا حبيت
ما بتحصلون وللاسف بالاخير طلع تسلية موب حب لان الحب الحقيقي شي نادر
بهالزمن

وسلمت قلبي لرب العالمين وهو سبحانه القادر على انه ياخذ لي حقي من كل اللي ظلموني انه على ذلك قادر

هذه قصتي بكتابتي شخصيا اضعها بين ايديكم لعلها تقع بين يدي فتاة تمر بنفس
ظروفي فتلحق عمرها وتستفيد من ماسي خواتها في عالم النت وتحفظ نفسها عن
المتلاعبين بقلوب البنات.

الله يحفظني ويحفظ جميع بنات المسلمين من الفتن ما ظهر منها وما بطن والله ينتقم لي من اللي ظلموني ويرد كيدهم في نحرهم اللهم امين


ملطوش لعيوونكم ^^

جاو جاو